«Ապրելու երկիր» կուսակցությունն ունի իր անհամաձայնությունները՝ կապված կառավարության կողմից «Տեղական ինքնակառավարման մասին» օրենքում փոփոխություններ և լրացումներ կատարելու մասին օրենքի նախագծի հետ, որն ընդգրկված է hունիսի 9-ի Ազգային ժողովի արտահերթ նիստի օրակարգում, և ներկայացրել է դրա հետ կապված իր առաջարկը։
Մասնավորապես, ըստ կառավարության առաջարկվող նախագծի, այսուհետ ՏԻՄ-երում մինչև 7 ավագանու անդամ ունեցող խմբակցություններն այլևս չպետք է ունենան փորձագետ, այլ կունենան միայն մեկ գործավար։ Մինչ այդ խմբակցությունները նման սահմանափակում չունեին․ անկախ ավագանիների թվից, ապահովվում էին գործավարով և փորձագետով։
Համայնքների խմբակցությունների աշխատանքում փորձագետի դերի թերարժևորում է, որ անհամաձայնություն է առաջացնում ՏԻՄ-երում ներկայացվածություն ունեցող «Ապրելու երկիր» կուսակցության ավագանու անդամների մոտ։
Հաշվի առնելով այն հանգամանքը, որ գրեթե բոլոր համայնքներում առաջին անգամ են ձևավորվել համամասնական ընտրակարգով ընտրված ավագանիներ, և խմբակցությունների ու ավագանու համակարգի ինստիտուցիոնալ կայացման հարցում կարևոր է համապատասխան մասնագիտական որակյալ աջակցությունը՝ «Ապրելու երկիր» կուսակցությունն առաջարկում է ՏԻՄ-երի դեպքում էլ կիրառել Երևանի մոդելը՝ մինչև 7 անդամ ունեցող խմբակցությունն ունենա քաղաքապետարանի աշխատակազմի հաստիքացուցակով սահմանված մեկ գործավար և մեկ փորձագետ, 7-ից 11 անդամ ունեցող խմբակցությունը՝ մեկ գործավար և 2 փորձագետ, իսկ 11-ից ավելի անդամ ունեցողը` մեկ գործավար և 3 փորձագետ։
Անընդունելի է թերագնահատել համայնքների զարգացման հարցում ավագանու ինստիտուցիոնալ կայացումը` ժողովրդավարական և հաշվետու կառավարում ապահովելու նպատակով, պետք է ամեն կերպ նպաստել ավագանու արդյունավետ և որակյալ աշխատանքին։