«Ապրելու երկիր» կուսակցության նախագահ, Երևանի քաղաքապետի թեկնածու Մանե Թանդիլյանը ֆեյսբուքյան իր էջում անդրադարձել է Երևանի խցանումների խնդրին․
«Երևանի խցանումների խնդրին լուծում տալու համար նախևառաջ պետք է բացահայտել և ճիշտ ձևակերպել վերջիններիս առաջացման պատճառները, իսկ դրանք քաղաքային ոչ պատշաճ կառավարման և տրանսպորտային անարդյունավետ համակարգի հետևանք են։
Այսօր երևանցիներին, Երևանի ճակատագրով մտահոգ մեր քաղաքացիներին ներկայացրինք մեր հերթական մեգանախագծերից մեկը՝ Երևանի երկրորդ տրանսպորտային մեծ օղակի հայեցակարգը։ Սա այն նախագծերից է, որն ուղղված է մայրաքաղաք Երևանի տրասպորտային «հիվանդության բուժմանը», և այն առաջարկներից, որից երևանցիները չեն կարող հրաժարվել։
40 մ լայնությամբ և 7.2 կմ երկարությամբ ճանապարհային մեծ օղակի նպատակն է բեռնաթափել Կենտրոն վարչական շրջանը։ Ճանապարհը հնարավորություն է տալու Երևանի արևմտյան հատվածով շրջանցել Փոքր Կենտրոնը և Իսակովի պողոտայից դուրս գալ Սարալանջի փողոց։ Բացի դա՝ ավելանալու են նոր կանաչ գոտիներ, հեծանվային արահետներ, բարելավվելու է բնակֆոնդը, ստեղծվելու են կառուցապատման և ներդրումների նոր հնարավորություններ։
Քանի դեռ գործի չի դրվում համակարգային բարեփոխման ռազմավարություն՝ Երևանը շարունակելու է լինել անհարմար քաղաք և՛ հետիոտների, և՛ վարորդների համար»,-գրել է նա։
