Այսօր 1988-ի երկրաշարժի 34-րդ տարելիցն է։
Ամեն տարի դեկտեմբերի 7-ը բոլորիս համար ոչ միայն ոգեկոչում, այլև մեր հայրենակիցների առջև ունեցած պարտքի մասին հիշեցում է առ այն, որ աղետի գոտու ամբողջական վերականգնումը համազգային խնդիր է, և բոլորս պետք է մեր ներդրումն ունենանք այդ գործում։
Զոհերի հիշատակի արժևորման լավագույն դրսևորումն ինչպես Գյումրու, այնպես էլ տուժած մյուս բնակավայրերի վերածնունդը կլինի, որին պետք է հասնենք միասնական ջանքերով:
Նման արհավիրքները կանխարգելելու համար անհրաժեշտ է չեզոքացնել 1988-ին այդքան ավերածությունների հանգեցրած ռիսկերն ու պատճառները՝ խստագույնս հետևել Հայաստանի ամբողջ տարածքում սեյսմակայունության մակարդակի բարձրացմանն ուղղված միջոցառումներին, պահպանել անհրաժեշտ նորմատիվներն ու կանոնները, մշտապես հաշվի առնել Հայաստանի՝ սեյսմիկ ակտիվ գոտի լինելու փաստը, բարձրացնել բնակչության իրազեկման և տեղեկացվածության մակարդակը։