Այսօր մեր սիրելի Երևանի հիմնադրման օրն է։ Աշխարհի հնագույն քաղաքներից, 2804-ամյա մեր մայրաքաղաքն անցել է տարբեր փորձություններով և մեզ հասել արդեն հազարամյակների փորձն ու դիմակայելու կամքն ամբարած։
Անկախ Հայաստանում այն դարձել է համայն հայության մայրաքաղաքն ու այցելության ամենանախընտրելի վայրերից մեկը։ Պատահական չէ նաև, որ օտարների համար էլ այն ամենահյուրընկալ ուղղություններից է։
Սակայն, այս իրողությունները մեզ նաև պարտավորեցնում են ավելի զարգացնել և հինը արժևորելով՝ ժամանակակից դարձնել մեր քաղաքը։
Հիմա արդեն պարզապես իրավունք չունենք աչք փակել այն բազմաթիվ ու բազմաբնույթ խնդիրների վրա, որոնք տարիներ շարունակ կարոտ են մնացել լուծման։
Երևանին այսօր պետք են հոգատար ձեռքեր, որ մաքուր պահեն բակերն ու փողոցները, որ խնամեն այգիները, սրտացավ վերաբերմունք, որ չավիրվի գեղեցկությունը, հնությունը, նոր մոտեցումներ, որ մեր քաղաքն ավելի հարմարավետ, ապահով ու ժամանակին համահունչ դառնա։
Մեզ քաղաքը զարգացնելու պրոֆեսոինալներ են պետք, մարդիկ, որոնք տեղյակ են քաղաքի խնդիրներից և ունակ են դրանք լուծելու։ Քիչ խոսք, և շատ գործ է պետք։
Երևանցիները, վստահ ենք, ունեն այդ գիտացումը և կարող ենք պահել մեր քաղաքի դեմքը և ամեն ինչ անել նրա հավիտենական կյանքը ապահովելու համար։