Մայիսի 9-ը՝ Հաղթանակի ու խաղաղության օրը, հայ ժողովրդի համար առիթ է՝ երբեք չմոռանալու իր ամուր կամքի, ուժի ու իր խաղաղությունն ամեն գնով, անմնացորդ նվիրումով պաշտպանելու հնարավորության մասին։
Սրանից 77 տարի առաջ՝ Հայրենական պատերազմի օրերին, մեր պապերի հերոսությունները, նաև դրանց շնորհիվ կերտված հաղթանակը հետագա սերունդներին փոխանցել են մեծ հավատ ու վստահություն սեփական ուժերի նկատմամբ։
Հայ ժողովրդի հերոսական պատմություններն են հետագայում՝ արդեն 1990-ականներին՝ Արցախյան առաջին պատերազմում, ոգի ու ուժ ներարկել մեր հայորդիներին, որ ապավինելով սեփական ուժերին, կարող ենք հասնել մեծ հաղթանակի։
44-օրյա Արցախյան պատերազմից հետո, երբ ունեցել ենք անդառնալի մարդկային և ցավալի տարածքային կորուստներ, առավել քան երբևէ կարիք ունենք վերհիշելու մեր սխրանքների, ոգեղեն ուժի և բոլոր անկարելի իրավիճակներից դուրս գալու մեր կարողության մասին։
Մենք երբեք չպետք է մոռանանք, որ մեր խաղաղությունը կարող ենք պաշտպանել միայն հաղթանակին հասնելուց հետո։
Այսօրվանից ևեթ յուրաքանչյուրս մեծ հոգատարությամբ պետք է լծվենք մեր երկրի զարգացման գործընթացին՝ առջևում ունենալով միայն նոր հաղթանակների հեռանկարը: